नॅशनल क्राइम रेकोर्ड ब्युरो ही गृह मंत्रालयातंर्गत येणारी संस्था आहे. देशभरातील गुन्हे व त्यांच्याशी निगडीत घटनांचे आकडेवारी एनसीआरबी जाहीर करते. एनसीआरबीच्या आकडेवारीनुसार बेरोजगारीमुळे वर्ष २०१८ मध्ये १२ हजार ९३६ लोकांनी आत्महत्या केली. तर, कर्ज व शेतीच्या इतर कारणांमुळे १० हजार ३४९ जणांनी आत्महत्या केली.

वर्ष २०१७ मध्ये १२ हजार २४१ जणांनी बेरोजगारीमुळे आत्महत्या केली होती. तर, कृषी संकटामुळे १० हजार ६५५ शेतकऱ्यांनी आत्महत्या केली होती. तर, वर्ष २०१६ मध्ये बेरोजगारांपेक्षा शेतकरी आत्महत्यांचे प्रमाण अधिक होते. त्यातही फारसा फरक नव्हता. वर्ष २०१६ मध्ये ११ हजार ३७९ शेतकरी-शेतमजुरांनी आत्महत्या केल्या होत्या. तर, ११ हजार १७३ बेरोजगारांनी आत्महत्या केल्याची नोंद आहे.

आत्महत्यांचे प्रमाण वाढले असल्याचेही एनआरबीने म्हटले आहे. देशात वर्ष २०१८ मध्ये आत्महत्येच्या घटनांमध्ये ३.६ टक्के वाढ झाली आहे. वर्ष २०१८ मध्ये १ लाख ३४ हजार ५१६ मृत्यू हे आत्महत्या म्हणून नोंद करण्यात आले होते. तर, वर्ष २०१७ मध्ये १ लाख २९ हजार ८८७ जणांनी आत्महत्या केली होती.

बेरोजगारांच्या आत्महत्यांमध्ये ८२ टक्के पुरुषांचा समावेश आहे.