३० हजार पदांसाठी शिक्षक भरती राज्यात लवकरच करणार- मुख्यमंत्री शिंदे

सिंधुदुर्ग जिल्ह्यातील वेंगुर्ला येथे आयोजित करण्यात आलेल्या महाराष्ट्र राज्य प्राथमिक शिक्षक समितीच्या त्रैवार्षिक अधिवेशनाला उपस्थित राहून शिक्षकांशी संवाद साधला. pic.twitter.com/AGiLuPCGXc

— Eknath Shinde – एकनाथ शिंदे (@mieknathshinde) February 16, 2023

राज्यातील सर्व स्थानिक स्वराज्य संस्था व खासगी व्यवस्थापनाच्या शाळांमध्ये पवित्र प्रणालीद्वारे शिक्षक भरती करण्यात येणार आहे. या शिक्षक भरतीसाठी अभियोग्यता व बुद्धिमत्ता चाचणी परीक्षा घेण्यात येणार असून, यासाठी तब्बल 2 लाख 40 हजार उमेदवारांची नोंदणी झाली आहे.

राज्यातील बहुसंख्य शाळांमध्ये शिक्षकांच्या जागा रिक्तच पडल्या आहेत. या जागा भरण्याची घोषणा शिंदे-फडणवीस सरकारने केली आहे. शिक्षकांची नोकरी मिळविण्यासाठी शिक्षक पात्रता परीक्षा, अभियोग्यता व बुद्धिमत्ता चाचणी परीक्षा उत्तीर्ण होण्याची अट घालण्यात आली आहे. सन 2017 मध्ये पहिली चाचणी परीक्षा झाली होती. या परीक्षेसाठी 1 लाख 91 हजार उमेदवारांनी नोंदणी केली होती. त्यातील 1 लाख 72 हजार उमेदवारांनी प्रत्यक्ष परिषदेला उपस्थिती लावली होती. त्यानंतर पाच वर्षात ही अभियोग्यता व बुध्दीमत्ता चाचणी परीक्षाच झाली नव्हती. शिक्षक भरतीकडे आस लावून बसलेल्या उमेदवारांनी परीक्षा घेण्याबाबतची मागणी शालेय शिक्षण विभागाकडे अनेकदा केली होती. अखेर त्याची गांभीर्याने दखल घेऊन महाराष्ट्र राज्य परीक्षा परिषदेच्या वतीने अधिसूचना प्रसिद्ध करण्यात आली होती.

उमेदवारांना ऑनलाइन प्रवेशपत्र 17 फेब्रुवारीपासून उपलब्ध होणार आहे. ही परीक्षा 22 फेब्रुवारी ते 3 मार्च या कालावधीत होणार आहे. परीक्षेसाठी दररोज दोन बॅचेस करण्यात येणार आहेत. जास्त नोंदणी झालेल्या महत्वाच्या शहरात परीक्षेसाठी एखादी बॅच वाढविण्याचे नियोजनही करावे लागणार आहे.